Feb 11th, '15, 23:09
121 郊區、郊縣、四鄉嗌法嘅由來
嚴格啲講，除咗廣州舊四區（東山越秀荔灣海珠）之外，廣東省其它嘅埞方都係屬四鄉嘅範疇，四鄉並唔淨衹粵中西嘅廣府區，仲包括粵東嘅潮汕同粵東北嘅客家。
但係離廣州近啲嘅新四區（黃埔天河芳村白雲，佢哋都係由以前嘅廣州郊區分拆開嚟嘅），同埋花縣，番禺，通常唔叫四鄉，而係叫郊區，郊縣。
至於南海，順德，中山，三水雖然離廣州都幾近，不過佢哋歷嚟係佛山管開，唔同埋廣州一個行政系統，所以佢哋甚至比同廣州埋堆嘅從化，增城更易於畀人認為係四鄉。從化，增城喺廣州人心目中似乎定義成郊縣多過定義成四鄉，呢啲就係一個地方嘅歷史沿革影響到普羅民眾慣性認同思維嘅例證嚟喇。
以前屬於惠陽地區嘅東莞，離廣州都好近，但係由於佢唔係廣州嘅郊縣，而係另一個地區嘅屬縣，感覺好似離廣州好“遙遠”，噉咪就四鄉囉。