Feb 17th, '15, 09:52
255 軍部搶權亂政 第三次世界大戰 必定會由支那所挑起！
之前我睇過一部NHK嘅紀錄片，題材係關於1945年日本戰敗前佢嘅殖民拓殖歷史嘅。裡頭有一段，係探究日本20-30年代初民選文官政府係點樣失勢、國內民族主義係點樣抬頭、軍部又係點樣乘機借勢搶權嘅。
起初日本民選嘅文官政府，對民族主義，係利用加壓制，就好似而家嘅支共文官政府噉，後嚟民族主義坐大，日本文官政府對佢完全失控，於是軍部就脅民族主義嚟搶權，結果以20年代末30年代初三個文官首相嘅相繼被刺為拐點，標誌著文官管治時代嘅終結，日本國內徹底失去咗對右翼嘅壓制力量，日本最終由一個民選嘅民主國家蛻變成由軍政府獨裁統治國家。
二戰前嘅日本，由民選民主變軍事獨裁，咩事件最可以突顯出呢兩者間嘅轉捩？噉顯然係以民選文官首相畀右翼民族主義狂徒接連刺殺呢一系列血腥事件最具標誌。再嚟睇返我哋依家嘅境況，現時嘅世界，可以話係相對太平，講求人性同民主，崇尚理性同法治，呢啲都係當世嘅普世價值嚟。所以，而家再搞暗殺呢家嘢嚟表達不滿宣示訴求，顯然係不合事宜，兼且為當今世界輿論所不容，邊個敢做，肯定會即時畀人打成恐怖分子冇得傾。
又唔可以殺咗妳，我又要宣洩不滿，噉而家嗰啲畀民族主義燒壞腦嘅支那軍頭又可以點做呢？最簡單而又直接嘅做法，就係明剃眼眉！點剃法最落妳面？咪我私自做啲嘢等全世界都經已唱通街唯獨妳最後至知囉。今次殲20試飛就係最好嘅樣例。
今次殲20呢單嘢，可以話係自鄧小平死咗之後，近十幾年嚟，支那軍部對支那文官政府嘅最大羞辱。以當今咁理性平和嘅全球氛圍而論，呢件事嘅爆炸性，絕對唔亞於日本當年嘅文官首相遇刺事件。
胡錦濤嘅文官政府到目前為止，雖然仲可以壓制著支那國內越嚟越囂烈嘅民族主義，甚至乎仲可以有的放矢噉加以利用，但係，噉並唔能夠掩蓋到佢嘅文官政府喺支那軍部面前越嚟越失威嘅尷尬同落魄。尤其從2010年年頭開始，支那軍部喺美韓軍演等敏感問題上高，屢次喺公開場合擺出強硬姿態，吹水唔maat嘴，高調反美韓黃海軍演，擺到明就剃支那外交部嘅眼眉；再到今鋪胡錦濤等一眾文官連殲20試飛咁大單嘢都烏soesoe，支那軍部越嚟越當胡錦濤嘅文官政府透明，前兩年成日噏著嘅黨指揮槍，家下冇晒聲氣。種種跡象表明，現時支共文官政府經已越嚟越失去對支那軍部嘅控制力。所以今鋪胡錦濤訪美，美報一面倒彈佢冇料到，華府對佢喺支那到底有幾多實權同影響力亦越嚟越懷疑。
有美國國會議員話而家係最危險嘅時刻，係好有道理嘅，因為，現時嘅支那，經已係一隻頭腦接近失常而四肢開始亂舞嘅怪獸，國家嘅最高決策，尤其係最高軍事決策，極唔透明，而且冇任何可信賴嘅途徑可資推測，妳簡直唔知佢下一步會點出牌，噉的確好得人驚。再加上越嚟越囂烈嘅民族主義喺側近搧風點火，戰爭情勢可以一觸即發。
二戰前日本帝國嘅政治情勢，就類似於現時嘅支共文官喺檯面主政，而各路軍頭喺後邊暗湧。當年，日本嘅文官政府查實都仲有幾分清醒，係好唔想咁瘋狂亂嚟，大肆到處擴張嘅，不過佢力水有限，抵抗唔到國內越嚟越囂烈嘅民族主義嘅侵擾，而且，佢亦都越嚟越壓制唔著軍部裡頭各路軍頭嘅自作主張同自行其事，結果畀班燒壞腦嘅軍頭陸續整咗出諸如9.18、7.7、突襲珍珠島等嘅大頭佛，既成事實冇得改變，日本嘅文官政府唯有畀班癲狂嘅軍頭扯著嚟行，變咗做傀儡。而家嘅支那，情形同當年嘅日本，簡直係一模一樣！
我哋對比下英美同日德嘅崛起，好容易就睇得出英美式崛起係自然而然、非人力強力催谷嘅，個中帶著理性同智慧。英國喺崛起歷程當中，從嚟都冇帶著要稱霸世界呢個咁強烈嘅企圖，佢甚至連稱霸歐洲都唔想，佢祗係竭力維持歐洲大陸嘅政治均勢，而將成付心思放喺點樣開拓海外殖民地上高，佢開拓海外殖民地，最大目的並唔係添加領土，而係要開拓英製工業品嘅市場，促進英國對呢啲地方嘅商業往來，以增添英國嘅利益。可以講，佢主要係為錢而唔係為地。而美國，爭霸動機就更加單純，美國早喺1894年，佢嘅工業產值就經已世界第一，但係佢奉行嘅孤立主義使佢一直潛龍勿用，直到50年後嘅二戰結束，佢至企出嚟打救歐洲。
而日德嘅崛起就好唔同，講得唔好聽係冇乜理性可言，佢哋當時嘅政府，都帶著顯著嘅民族主義情緒，一個要推翻白種人所主導嘅世界秩序，一個要按實力重新瓜分世界，喺佢哋國民嘅思緒裡頭，都呈現著一個好重要嘅特徵，就係充滿著唔甘心！
就係呢種唔甘心，導致佢哋有過份嘅企圖，即使喺佢哋嘅精英階層裡頭，有唔少人都清楚呢種非份企圖嘅危害，但係喺民主浸洗根基單薄民智普遍未開嘅下層民眾裡頭，民族主義顯然更加容易畀人認受。日德喺全面軍國主義之前，假假哋都係進行過民主選舉嘅，普羅民眾都有民主選舉經驗，佢哋嘅民族主義化更加多可以歸結於“東方”色彩未脫。
而睇返今日嘅支那，佢嘅民眾乜民選經驗都冇民主浸洗更加無從講起，佢嘅民眾民智普遍未開經已可以肯定，佢嘅精英階層關心自己嘅私人利益要遠遠多過關心自己嘅民族國家，支那又堪稱全世界最“東方”嘅，而而家支那國內越嚟越囂烈嘅民族主義，同當年日德崛起嗰陣相比，可謂有過之而無不及，以上種種跡象都表明，支那今日嘅崛起，比當年嘅日德更危險！喺度大膽啲講埋，日後嘅第三次世界大戰，必定會由支那所挑起！